Naaresto ng pulisya ang isang high-profile guerilla ordnance expert sa isinagawang raid sa hide-out nito sa Barangay Bual, Isulan, Sultan Kudarat kagabi.

Inihayag ni Isulan Police Chief Saiben Acmad na miyembro ng Moro Islamic Liberation Front (MILF) si Aladdin Dumpao at sinanay ng Jemaah Islamiah sa paggawa ng improvised explosive device (IED) sa Afghanistan.

Isinasangkot si Dumpao sa serye ng pambobomba sa Central Mindanao sa nakalipas na tatlong taon at sangkot din sa pagpapasabog ng mga business establishment sa General Santos, Koronadal, at Tacurong City at nasa likod din daw ng serye ng mga pagpapasabog sa mga power transmission towers ng National Grid Corporation of the Philippines (NGCP) sa North Cotabato.

Nakuha mula sa suspek ang mga granada, mga sangkap sa paggawa ng bomba, diagram para sa improvised explosive devices at mga cellphone na ginagamit na triggering device.Report from Noel Alamar, Radyo Patrol 38